Wagyu Ya (Closed)

突然間又好想食燒肉，上網search見尖沙咀開咗間新開嘅燒肉店，當然要先食為快啦。點鋪唔算係好大，有卡座有吧枱。幸好今日唔多人，去到都仲有位。牛肉餃子炸彈 - 餃子脆卜卜，咬開充滿肉汁得嚟牛肉味香濃。作為餐前小食非常之唔錯。茶壺湯 - 材料好豐富，有白合、豬肉、蟹肉、鮮蝦、日式魚蛋同埋香菇。材料好新鮮，湯好清，味道好似茶碗蒸，好特別。西京豚肉 - 燒肉就唔一定要全牛嘅，所以叫咗依客西京豚肉。店員介紹話豚肉經師傅用自家醬料醃過，食嘅時候唔需要再點額外醬料。果然，燒好後嘅豚肉好夠味，而我都明白點解叫西京豚肉，因為豚肉用咗西京燒嘅醬料醃好。豚肉少少嘅油脂，香而不膩，價錢亦十分相宜，好值得推介俾大家。肉食者 - 和牛拼盤我就點咗肉食者，包括咗厚牛舌、薄牛舌、牛小排、牛柳同肉眼各4片。厚薄牛舌俾到我兩個層次嘅口感，薄牛舌輕輕燒熟，香脆夾口；厚牛舌就軟嫩厚實。牛小排同牛柳牛肉味最香濃，牛柳油花比牛小排多，入口除咗牛味，仲帶有一陣油香。我覺得最好食嘅就係肉眼部份，有牛肉味之如，油花分布均勻，入口即溶，油而不膩，可以話係大滿足。