小河內

Open Now

Now Closed

約咗朋友係新界一日遊，行到攰就係粉嶺附近搵間餐廳食下嘢。見到小河內環境都乾淨企理，咁就入去試下，估唔到食物質素都好好，而且價廉物美，所以諗唔到食咩都可以揀呢間餐廳試下😁餐廳衛生同舒適度都幾好，枱面清潔，唔會油淋淋。見到都有員工做清潔，餐廳整體整潔企理。而且，座位唔會好迫，都算幾闊，坐得舒服。我哋係下午茶時段嚟，係餐廳食完嘢再坐多咗陣、傾陣偈都無員工嚟趕人走。而且，服務幾好，員工都好有禮貌。我哋幾個人點咗春卷撈檬、豬頸肉撈檬、火車頭湯河同咖哩豬扒飯。總體嚟講，食物質素唔錯，價錢都唔貴，性價比高。首先講下春卷撈矇同豬頸肉撈檬，檬粉爽口，個粉撈埋甜酸汁，酸酸甜甜好開胃。但估唔到係個越式炸春卷係咁好食，春卷皮脆卜卜，而且唔會好油，個餡有少少木耳，口感有層次，重點推介。而豬頸肉都係爽彈口感，算唔錯。食親越南嘢就一定要點火車頭湯河！最怕就係個湯底好多味精，食完就會好口喝。但今次呢個個湯應該無咩味精，食完唔會要係咁飲水，同湯底都有陣陣牛味。而今次推介係佢嘅牛丸，牛味濃郁，而且彈牙，口感唔錯。整體而言，呢個火車頭湯河都係推薦。而朋友就鍾意食飯，所以點咗個咖哩豬扒飯，個咖哩都幾香，少少辣，而豬扒都鬆軟。