天丼てんや

Open Now

Now Closed

個人好鍾意食天婦羅蕎麥麵，每年去日本玩都一定至少食一餐，聽朋友講話呢間嘢好掂所以特登過嚟試吓。星期六lunch hour, 排隊一個鐘左右有位都算ok嘅，排隊嗰陣前面同後面個family都係講日文，心諗如果連在港日本人都慕名幫襯應該冇伏。果然，井飯方面，size大份抵食，米飯食得出係日本珍珠米，濕潤飽滿軟硬適中; 天婦羅炸得乾爽唔油膩，粉衣夠薄身，食材新鮮，海鮮唔腥，雞肉肥美，蔬菜不帶草青味; 蕎麥面就紅湯同白湯都有試，白湯清爽，紅湯濃郁，蕎麥麵真心推，口感似手工製品，彈牙爽口真係有蕎麥香。個人推薦天婦羅蕎麥麵套餐配白湯。最後不得不讚吓啲員工嘅工作態度，好笑容又親切，難得仲好有耐性，隔離枱有個婆婆同孫女對點餐有啲問題，有個幾後生嘅女店員好細心咁解釋點餐流程，又指出幾個比較受客人歡迎嘅套餐畀兩婆孫參考，真心讚。