豐石板燒專門店 (Closed)

之前食過幾間石燒都高質，但價錢都有番咁上下，今次經過通菜街見到新開，價錢又咁親民，即管入去試！舖頭環境ok，唔算大，逆 （疫）市開店，各方面都做得叫足，有partition ，檯同檯都有小小距離！嘢食選擇唔算多，石燒嚟講係咁上下，牛豬海鮮都有，牛分幾級，豐檢由人！所有石燒扒都包埋semi-buffet, 白飯任裝，湯任飲，沙律任食！牛扒: 今次試咗個平嘅，嚟到係全生咁滯，中意幾成熟，就自己調節番！牛扒唔厚，都熟得頗快，注意火候，今次我哋就燒得過熟，有小小韌，牛係夠味嘅，燒完畀小小粉紅岩鹽已經好夠味！仲有三隻汁揀，燒汁，黑椒汁同豬扒汁！西班牙豬: 淋得嚟，豬腥味唔重，最重要唔鞋，呢個高質！小食就比較一般，正常水準！兩支冷泡茶幾出色，味清茶底又唔濁，飲完可以refill, 可以重泡兩三次，飲唔晒拎咗番屋企，第三轉加水都仲係好有味！線括嚟講，CP value 高，咁嘅價錢食到semi-buffet 石燒，絕對係超值，幾個後生仔女自己創業，經過不妨幫襯一下！