DALLOYAU (Closed)

如果你有留意我既post，可能都發現其實我都係DALLOYAU既粉絲。一年一度大日子，係DALLOYAU訂左個蛋糕慶祝生日。DALLOYAU係來自法國既，今次揀左嗰款蛋糕叫Enchanting Apple，size係18cm，價錢$668。呢款蛋糕仲有個細啲嘅size係16cm，賣$438。跟蛋糕有塊心形或者圓形嘅朱古力慶祝牌。個蛋糕盒好大好靚，用靚絲帶綁好。不過其實入面個蛋糕細好多。個蛋糕賣點明顯係啲粉紅色嘅朱古力絲帶，上面仲有散落唔同位置嘅金箔。不過好可惜，有一忽絲帶係斷左，我地睇返啲相先發現原來我哋喺蛋糕店拎走之前已經斷左，雖然蛋糕正面望落去唔為意，但係都睇到斷左，都幾令人失望。除左粉紅色絲帶，蛋糕用左同樣嘅粉紅色朱古力片圍邊。朱古力係法國33%白朱古力，本身係又薄又滑，係好食嘅。至於拎走哂啲朱古力之後呢，個蛋糕就係有三層好普通嘅白色chiffon蛋糕，夾住兩層只有微微青蘋果味嘅啫喱同香滑而唔過膩嘅忌廉，味道黎講真係平平無奇，無乜層次感又冇特別，係輕盈唔膩一啲都唔重口味嘅，不過俾得呢個價錢唔會預收呢個貨色。失望至極。