牛涮鍋 (Closed)

Encore左無數次牛涮鍋外賣自取，今次終於記得影齊相，第一次喺Openrice同大家分享。由20年4月 4人餐 $638 半價 $319，之後加價變成6折$382.8，都一直支持；至11月尾再加至7折$446.6，就覺得無咁抵，暫時唔幫襯了。可能反應冷淡，12月餐單加左自蜆及換了丸丸種類，重回6折，現時$658折後 $394.8。美國和牛大大片600g，雪花靚仔，牛味濃，建議淥兩淥就食，淥耐左會韌及鞋口。牛胸腹300g，薄薄片，但油花更香，不過有時會較肥，淥一淥好快熟。豚梅肉150g，絕對不比牛差，豚肉鮮甜，試過單買煮麵也很抵。虎蝦、帶子、白蜆，當然唔夠自己喺街市買咁新鮮，不過套餐有埋，配搭一齊食都唔錯唔錯。丸丸蔬菜盛盒有2大盤，每樣人人有一件，滿足樣樣試試既心態。最後仲有4個拉麵，通常即晚都食唔曬，留返第二日連甜醬油湯再煮當午餐食。套餐已配有湯膽(推薦甜醬油，配牛肉就好似壽喜鍋咁)，也有醬油及麻醬，自己不用準備。