Ember (Closed)

喺銅鑼灣行完街，行吓行吓見到呢間西餐廳裝修咁靚咁別緻，就同朋友入去試吓佢，發現原來佢並唔係虛有其表，嘢食一樣咁出色。我同朋友一人叫咗一個set dinner。頭盤先係一個自家製嘅麵包，跟住就係南瓜餐湯，香蒜辣椒煎蝦，Beef Wellington，同埋自家製嘅開心果雪糕。先講吓佢哋自家製嘅麵包，麵包非常鬆軟，亦都散發着陣陣嘅香味，配埋牛油熱辣辣咁食真係食得出係水準之作。跟住個餐湯飲得出係用好多南瓜去打嘅，濃濃嘅南瓜味加埋海鮮真係非常夾，亦都非常甜。跟住到個蒜片辣椒煎蝦 ，濃郁嘅蒜香味同埋少少辣辣地，配埋非常新鮮嘅蝦真係天衣無縫，一再回味。威靈頓牛柳完全唔需要講太多，簡單來講就係做到應有要做嘅嘢。酥皮夠脆，切開唔會散，有自家製嘅蘑菇醬同埋風乾火腿，嗰陣鹹香味帶返出牛嘅味道，火候控制得啱啱好，絕對值得一試。甜品亦都係主打嘅自家製開心果雪糕，食落去係有開心果仁嘅口感同埋好香嘅開心果味，亦唔會太甜，所以避免左太膩嘅感覺。