法國雪山咖啡 (Closed)

呢晚同朋友想舒舒服服傾吓計，於是就去咗個同事介紹嘅法國餐廳，試一試係咪咁正先。原來餐廳喺渣甸山居民協會嗰度，附近環境清幽，入到空間感十足，裝修擺設係歐式風格。再嚟就係睇吓有咩食，同朋友都揀咗 set dinner 試吓。我哋2個都揀咗龍蝦湯，嚟到見到湯唔係水汪汪嗰種，飲落有濃濃嘅龍蝦味，好鮮好濃，真係好有蝦味呀! 跟住就到餐包，呢款係軟身嘅法包，烘到熱辣辣，食到陣陣麵粉麥香，一放牛油落去，就即刻溶化，為餐包加多一份咸香。前菜我要咗焦糖鵝肝，鵝肝焗得香口，同平時食到嘅煎鵝肝唔同，呢種煮法無咁油膩，鵝肝質地軟滑濃香，配埋多士食好夾。朋友叫咗帶子雲吞仔，帶子煎得剛好，又鮮又淋，雲吞仔釀有芝士饀，啖啖都食到細心之作。主菜我哋 share 食，要咗慢煮法國牛舌，牛舌煮得好淋好入味，配菜嘅薯仔焗得好香又好綿，加埋芝士同牛油，真係好好食! 另外，一束豆角用煙肉卷住，足見心機之作。我哋仲揀咗香芒千層豬柳，面頭蓋住鬆脆酥皮，然後下面就係一層豬柳，一層芒果咁互相相間，芒果應該經過醃製，食落似芒果乾但淋啲嘅質地，有好香芒果味之餘，亦有煙韌嘅口感，好特別，全部材料加埋綜合咁食，呢個配搭好清新。餐飲要咗咖啡同熱