Fish & Chick (高街) (Closed)

有時覺得自己真係個怪胎，明明唔食魚（ 細個家長日時阿媽成日向老師投訴我唔食魚大頸泡😆），但係就超鍾意食日本魚生，銀雪魚，鹽燒鯖魚，早排過海做完嘢，仲專登走咗去食 fish and chips。呢度嘅 set lunch 包括頭盤，主菜同飲品，頭盤四揀一，我揀咗店家推介嘅炸鮮蘑菇沙律，沙律菜份量頗多，炸蘑菇則有兩大粒，望落去好似好乾身，點知一咬落去，感覺非常 juicy😮，成粒菇炸得既香脆又能夠鎖住入面嘅水份，非常高質👍。主菜五揀一，雖然睇評論好多人話烤雞好好食，但係我就當然揀 fish and chips 啦。炸魚都有四種選擇，對於我呢啲唔識魚之人，揀平揀貴其實都食唔出咩分別😂，所以就揀咗最平嘅紐西蘭藍鱈魚。首先要讚下塊魚柳真係又大又厚，肉質好嫰滑，配埋檸檬汁同埋粗鹽一齊食，非常鮮味；底下啲薯條係我最鍾意嘅粗薯條，薯味濃，炸得好脆又唔會油淋淋，好食。食完個午餐，硬係覺得好快會喉嚨痛出唔到聲，不過，就真係覺得好滿足，好回味🤗。