Lady Nara

Open Now

Now Closed

之前每次經過呢間Lady Nara都見好多人排緊隊，今次見唔使排就決定入去試下。呢度似係fusion泰國菜，好多菜色都係泰國菜主題再加啲其他特色。先嚟一個鮮茄冬蔭忌廉湯，冇咗一般冬蔭功有嘅辛辣味，飲落係好creamy，似番茄湯，有飽肚感，同埋都幾大碗。主菜要咗香茅烤雞同海鮮冬蔭意大利飯。香茅烤雞好食在佢個香茅汁配檸檬汁，少少酸，感覺冇咁肥膩，雞肉都烤得唔錯，皮脆肉嫩。海鮮冬蔭意大利飯係誠心推介，本身除咗平時食開嘅意大利飯嗰種creamy嘅口感之外，仲有酸酸地嘅冬蔭功味道，好特別，隻蝦都好食。甜品就揀紫薯香芋班戟配雲呢拿雪糕同埋泰式奶茶意大利芝士餅。班戟雖然唔係梳乎厘嗰種咁軟綿綿，但就好夠份量，再配搭雲呢拿雪糕同個紫薯cream真係甜而不膩。泰式奶茶意大利芝士餅就真係好夠奶茶味，比一般Tiramisu更加甜，鍾意甜甜嘅奶茶香就應該啱哂。