Häagen-Dazs (Closed)

今晚用雪糕黎作結，真係無其他（硬）雪糕會好得過Häagen-Dazs！外賣雪糕我地都揀左華芙筒，分單球，雙球同三球，價錢分別係$60，$72，$85，可以自選雪糕口味。水果可以揀士多啤梨，桃或者香蕉；醬料可以揀芒果，士多啤梨或者朱古力；配料可以揀果仁碎，粟米片或者朱古力碎。我地都揀左三球華芙筒！先講一講左邊既華芙筒！三球雪糕係香檸雪菓，夏威夷果仁，同玫瑰紅桑子荔枝。水果揀左桃。醬料揀左士多啤梨。配料揀左粟米片。呢個華芙筒就係我既。三球雪糕係士多啤梨芝士餅（因爲無士多啤梨），夏威夷果仁，同藍莓。水果揀左士多啤梨。醬料揀左士多啤梨。配料揀左果仁碎。首先雪糕就無可挑剔啦，只係個雪糕球好似細左。個人覺得玫瑰紅桑子荔枝味道唔太出，好鍾意夏威夷果仁同士多啤梨芝士餅有多一重口感。華芙筒好厚身又香又脆，好好味道。士多啤梨得兩塊，但係新鮮過糖水桃。粟米片異常普通，果仁碎好d！士多啤梨醬適量唔過火。華芙筒好大個，要小心d攞住。同埋隻手好易掂到個華芙筒。而家加$29可以換購一個可愛造型既雪糕杯仲有三款自選口味雪糕球，不過雪糕球非常迷你，但係都好抵，小朋友實鍾意！