十二味巴蜀江湖菜 (Closed)

難得星期五放假，辣妹決定做一日閒人，搵多個閒人陪我hea食午飯，食飯地點當然係有辣椒出没嘅地方，所以今次去十二味。十二味地方細細，有少少茶記feel, 午市人流算多，八成滿。今餐叫咗夫妻肺片，水煮魚同麻婆豆腐。夫妻肺片 $78份量比坊間涼菜大，口味唔錯，食到有麻有辣又唔過鹹，食材口感亦幾好，算淋，只係偏凍，再常溫少少冇咁重雪氣會更好。水煮魚 $298水煮魚係用鱸魚，份量超大，兩個人冇可能食得哂一個14吋大盤。鱸魚口感可以，部份好滑好彈牙，但有啲就少少梅。 薯粉係好闊嘅水晶粉，口感幾好。整個水煮魚冇咩鹹味又冇咩香味，只算合格。經過一番努力，只係ko咗一半，突然覺得自己好敗家。麻婆豆腐 $68豆腐好滑，應該係百褔豆腐，汁醬做得幾好，夠杰，可以包住啲豆腐，唔會水汪汪，夠麻而且有牛肉碎，係整餐最滿意嘅一道菜。