Heart Coffee (Closed)

本人一向都係行生酮飲食，見完客諗住搵間coffee shop唞下氣，見到呢間都幾多好評又生酮友好，二話不說就揀佢啦！點知一入到去坐低，唔知以為自己去咗林峯演唱會，瘋狂播林峯，唔播林峯就播啲一聽就知有啲年代感既歌，嘩！真係乜mood都無晒。算，渣渣臨食住野走，我就叫咗個草飼牛扒（3成熟），諗住嗌生酮鮮忌廉咖啡，點知店員話無忌廉，話得杏仁奶加$5，心諗好啦，唔好成日黑咖啡咁齋啦，點知一上野飲，真係一啲heart都無，成杯野都係杏仁奶沉澱物，大佬啊，話晒都係間餐廳啊，真係衰過我自己沖，又稀又無咖啡味，失望！唯有寄情食物啦。草飼牛扒3成熟，我覺得係overcook既，食落好鞋，無牛味，反而個沙律菜仲好食過主菜。我同事呢就嗌咗個蟹肉酸種麵包，睇相都見到一啲都唔juicy唔滑。再黎一杯柚子橙咖啡，睇人啲相層次分明架喎，點知一上，張相係無攪拌過既，淨係飲咗啖，同事諗住反映下，唉，算啦，快快手食過走好過啦，唔好晒時間，呢間野真係食完心都碎埋，無下次！