Video
Read full review
2021-09-30
824 views
從來唔鐘意寫食評都想寫番篇。話說我之前都有call開app叫開外賣食呢間野，咁佢啲餅靚就一直都知。今次路過，直接自取，叫咗啲pizza同肉醬意粉，pizza餅皮同以往一樣咁正，之前都食得出喺手製皮，但都估唔到真係叫一單搓一單，唔怪得淨食餅邊啲皮都好似食緊啲貴佢成條街嘅酒店西廚咁，好有麵香同生命力。肉醬意粉app冇得叫，落街舖先有，順便叫嚟試吓，睇佢哋個餐牌真係會當咗佢係流流薄餅店中嘅一個side，但$58， 區內嘅午市價，佢全日供應，包沙律嘢飲好閒，個意粉卻絕不欺場，佢叫肉醬，唔知係咪食得太多大家樂，呢個食起嚟啖啖肉到好似食緊肉丸咁，摷極都仲有，重要嘅喺佢用嘅牛肉食得出喺同佢嘅肉丸pizza同一款，有肉味，鮮，肉質結實唔多肥肉但亦唔dry，反而有啲好香嘅肉膏肉汁，融合埋喺意粉裏面，好似食番細個嗰啲未偷工減料嘅真‧肉醬咁（但啲肉靚好多囉）。買意粉有得加廿蚊肉丸，真係後悔冇加。講明要等15-20分鐘都值。好多地方肉醬多就會麵少，但佢肉醬多，啲意粉都食得出冇少過，仲要加埋個頗有份量嘅烤焗芝士喺面，喺佢嗰啲用喺pizza上面、冇溝過奶油忌廉嘅靚拉絲芝士，壓得到落哂一個普通焗飯式鋁盒都算佢勁。開
Post