小店

Open Now

Now Closed

星期日晚上入咗嚟九龍城行吓，誤打誤撞地walk-in試咗小店呢間西餐廳。入門口餐廳俾我第一個感覺係好簡單，隨和樸素，而地方亦都好乾淨。坐低再睇一睇餐牌，發現不論前菜，湯，主菜，飲品或甜品，價格都非常親民合理。我和女友點了鴨肝多士，焗田螺，羅宋湯，鮮蝦濃湯同埋海鮮扁意粉，再加兩杯嘢飲。首先不得不讚服務員非常專業細心，上菜節奏會配合我哋用餐速度，享用完前菜先嚟個湯，飲埋湯先上主菜，唔會太急又唔會慢。再談味道，我哋對叫咗嗰幾味餸都非常滿意，好食得嚟味道適中，唔會過重或者太淡。每一碟熱盤到嘅時候都好夠熱，好明顯係啱啱煮好，唔會等咗一輪先至送過來。地方坐得舒服，又好食又抵食嘅西餐真係買少見少，所以我臨近埋單嘅時候上Openrice 望一望八卦下其他人點睇。點知一打開好驚訝地發現網上評價好一般，同我今晚嘅感受有好大嘅落差。我用左OpenRice十幾年以來好似都淨係寫過一次兩次食評，一啲都唔專業，希望大家體諒。今次寫嘅原因，都只係希望分享俾多啲人知道呢間餐廳做得好好，而自己都一定會再返嚟。本身就冇諗住寫食評，所以遺憾冇影相⋯ 最後埋單兩位$438，叫咗以上咁多樣嘢食嚟講，真係唔算好貴。