八寶清湯腩 (Moved) New Location

你鐘情於食牛嗎？雖然知道哩個動作並唔環保，但係我卻無從抗拒牛肉既騷香。噤係香港有好食既牛腩嗎？華姐既清湯腩質素四平八穩，新仙退一百個大步，九記水準飄忽且成自由行食堂，群記路途遙遠，去得來都已沽清。講來講去，都係沒有一間令我有種驚艷既感動。但係八寶，佢俾到我。第一啖湯，就知道佢既口味係行偏鋒路線，除了清湯必需既牛香外，仲有濃郁既當歸味。無錯，就係很台灣的那種药材湯頭，如果你去台灣愛吃羊肉爐之薑母鴨、藥饍排骨，八寶既湯頭你會一試傾心，肉香、葯香既回甘絕對令人難忘。噤，主角牛腩呢？為了一試其手勢，我叫了三寶，姐係爽腩，坑腩，崩沙腩。最愛既爽腩軟淋而不失咬口，兼具有濃郁牛香。坑腩入口一咬已經化開，肉味最濃，雖則對我來講就偏淋，但完全沒有塞牙既軟淋我並不抗拒。崩沙腩，連筋膜和肉兼具肉味同口感雙重享受，相當不錯。而更為重要既係、三寳濃厚既牛香更托出碗中蘿蔔的清甜，一濃一清，相互輝映，提升了味道上的層次。總而言之，八寶未必人人受落，但唔計其偏鋒湯頭的話，其牛腩質素相當之高，一定係我三甲之選。P.s.粉麵質素平淡無奇，且飛水不足會沖淡其濃湯，我建議大家叫淨腩，配撈麵或叫浄麵填肚便夠。