板上 (中海日升中心) (Closed)

觀塘區工業大廈林立，搵野食黎黎去去都係茶餐廳，好彩今日發現呢間餐廳，有日式同西式野食，又有個咖啡廳，環境舒適，以後可以有多一個食飯聚腳既選擇。午市有15個套餐，包括各款雞、牛、豬、羊、海鮮，配珍珠飯，同埋漢堡。叫左安格斯牛肉漢堡，配脆薯皇($72)，午市仲有限定優惠，加$8可以配一塊可樂餅。漢堡非常足料！安格斯牛肉好多汁，唔會鞋口，芝士溶化得岩岩好，配搭爽脆既番茄同生菜，每一啖都好好味。脆薯皇炸到金黃色，脆卜卜。而可樂餅填滿咖哩牛肉餡，兩款都好滋味。跟餐可配汽水，餐茶，又或者加$8配特製烏龍茶，茉莉綠茶，又或者加$10配特色梳打，水果茶，仙草冰等等。我就加錢配左胚芽港式奶茶，奶茶既味道好柔滑，加埋胚芽增加口感之餘，又有營養。餐廳座位闊落，有吧台位同卡位，有得睇電視，唔怕等餐時會悶。咖啡廳果邊佈置得好優雅，有各款蛋糕同咖啡。除左Espresso，Cappuccino尼d大路款式外，仲有啡糖薑蜜鮮奶咖啡，洋甘菊鮮奶咖啡，玫瑰鮮奶咖啡，係其他地方都好少見到有特別味道既咖啡。下次一於係tea time再黎，可以同朋友食蛋糕，嘆咖啡，過個悠閒既假日。