La Postre (永樂街) (Closed)

今日同朋友喺上環附近搵嘢食，上網見到一間評價好高同好近地鐵站嘅西餐廳，於是想去試下。 店內裝修好有特色，有好多吊燈，而我哋選擇坐喺一張高枱上面。 我哋叫咗個前菜蜜瓜黑毛豬，跟住叫咗個主菜西班牙豬手，最後叫咗個甜品雜果麻薯窩夫。 蜜瓜黑毛豬首先送上，上面大約有四五塊黑毛豬，肉質好嫩同好有味，加上蜜瓜味道好夾。 之後係西班牙豬手，西班牙豬手燒完再風乾，再切成碎片，淋上佢哋秘製嘅汁，味道好特別，豬手皮仍然好爽脆，最後加少少蜜糖，味道好清新。 最後係甜品，雜果麻薯窩夫，我哋叫咗全分 總共有四個窩夫組成，上面有唔同嘅雜果同一球大嘅雲呢拿雪糕，切開窩夫入面有好多麻薯。