慢煮工業 (Closed)

實習咁辛苦，終於等到紅日前夕，要同朋友聚一聚！！注意係太子有兩間分店，有兩個友人去錯咗地方，故事教訓食飯嗰陣時要睇清楚啦～～由於太攰，所以都費事睇餐牌，4個人點咗威靈頓牛扒同一個二人餐，再額外加兩杯飲品。威靈頓牛柳本身係要預訂，好好彩臨時問店員都有提供，4個人入面，包括我在內都係第一次食威靈頓牛柳，珍貴嘅第一次呀！因為係第一次食，唔知乜嘢先係煮得好。牛柳上嘅鵝肝醬好香，最可惜牛柳食落少少韌。求解答旁邊烤左嘅蒜頭係點食㗎🙈二人餐好豐富，有墨西哥辣粟米溫泉蛋沙律、安格斯西冷牛扒、烤豬仔骨兩支、烤豬仔髀兩支，同埋西西里肉醬意芝士焗意粉。牛扒不過不失。因為同朋友happy share，所以冇食到豬仔髀，食咗豬仔骨。豬仔骨夠入味，係唔會出錯嘅BBQ 醬，肉質唔會好嚡。西西里肉醬意芝士焗意粉好多芝士，仲有拉絲效果。每一口意粉都充滿肉醬。最後配埋Mojito潤下喉，因為餐廳環境比較嘈，要好大聲先傾到計。不過，可以放聲傾下是非都不失為一個減壓好方法。利申：唔係因為周杰倫嗰首Mojito先點。