爵樂印度餐廳

Open Now

Now Closed

今日同朋友行街前想食印度菜，喺尖沙咀搵到呢一間印度餐廳，之前嚟過呢幢大廈幾次，但係一直都冇留意過佢。原先我哋諗住散叫幾款咖喱，上到去餐廳員工同我哋講原來晏晝有buffet食，計埋加一$207一位，每人仲有兩杯嘢飲。除咗buffet嘢食可以任添之外，唔同口味嘅印度薄餅都可以無限叫，同朋友計過數咁樣抵食過散叫。整體食物質素符合預期，香料味好濃郁。因為預咗咖喱要配飯或者薄餅，所以就咁單食會偏鹹，但係加咗薄餅之後就啱啱好。值得一讚係佢個薄餅真係好好食個底夠脆，個面夠軟，每層酥中間都有空氣，唔係實的的嗰種薄餅。雖然個價錢唔係特別平，但係平時香港冇乜機會食印度菜，一個價錢可以食勻晒唔同款式，雞、羊、海鮮、素菜、豆、烤雞、咖喱角樣樣都有，仲有沙律、甜品、生果，其實計落都幾抵，啱晒咩都想食少少，純粹過口癮嘅我哋。餐廳環境舒適乾淨，一出𨋢口有個泰姬陵設計嘅框，裝修幾有心機。最值得一讚係呢度嘅員工同平時印度餐廳員工比較真係有善好多，老細廣東話仲非常之流利，完全冇溝通嘅困難。