桂月 (Closed)

眾所周知深水埗一帶開咗好多文清打卡Cafe，我身為一個偽深水埗人，當然會去試吓唔同嘅Cafe比較吓，今日我哋就揀咗桂月。店舖唔係好大，裝修亦都唔算花巧，帶點工業風，簡約就是美。午市套餐包咗湯或沙律，我哋一行二人當然揀各一開心share吓，田園沙律用多款唔同嘅沙律菜再加埋車厘茄混合而成，上面淋上沙律醬，味道簡單又清新。是日餐湯係甘筍湯，冇太多濃烈嘅調味，令甘筍味更加突出，好香好滑。今日唔想食咁多澱粉質，所以我哋其中一份就揀咗牛油果煙三文魚墨西哥卷配田園沙律，實行多菜少肉。除咗旁邊伴碟嘅田園沙律，墨西哥卷入面都有勁多沙律菜，再配以適量嘅煙三文魚。西西里蕃茄醬肉丸意大利粉嘅蕃茄醬味道酸酸甜甜，仲有好多蕃茄肉，肉丸總共有四粒，口感比較軟身，味道都唔錯。跟餐嘅果汁唔使加錢，菠蘿汁酸酸甜甜，有好香嘅菠蘿味。紅莓汁就最啱女士飲用，味道清新，而且夠晒冰凍。