麥當勞 (Moved) New Location

一年出入香港機場唔多，就算上大陸山區做嘢，我哋都喺取道深圳機場，因為嗰邊班次多啲，啲時間又好啲。今日嚟到香港機場，唔喺出門，而喺接老婆機，佢就好啦，同姨仔（即喺兩姊妹）兩個去咗北歐旅行，卒之完結咗15日嘅行程，所以，今日就專登入嚟接機。去到機場，發現佢哋嘅航班有延誤，加上我又早到咗，故晌抵達大堂層嘅McCafe打住躉先。食咗晏先過嚟，所以，嘆杯咖啡就最好不過。其實，一向都有晌美孚幫襯McCafe食早餐，佢哋啲咖啡真喺一啲都唔差。今次就揀咗杯伯爵茶鮮奶咖啡（Earl Grey Latte $27），單睇個拉花已經唔失禮啦，平衡一致，無話側埋一邊，最有心思仲晌杯面糝少少茶葉碎，伯爵茶嘅香味更突出。而飲落，杯嘢掂喎，咖啡味唔喺太重，但伯爵茶嘅香味又突出到，啱啲想飲咖啡又怕太重味嘅人。飲杯咖啡，碌吓手機，打吓食評，時間可以好快過。當然。依杯伯爵茶鮮奶咖啡有別於我哋嘅港式鴛鴦，但同樣好飲，味道好有層次。