九井壽司 (Closed)

呢排適逢第四波疫情，搞到夜晚六點後禁晒堂食，想約朋友見個面食飯唯有揀日頭時間。呢日嚟到九龍灣MegaBox商場，平時嚟MegaBox行完街多數會上FoodCourt搵下嘢食，今日就嚟到9樓呢間九井壽司。呢間餐廳玩新幹線列車送車概念，落單用平板電腦，唔需要用到實體點餐紙。我地用平板電腦落完單之後，食物就會由新幹線列車送到，而且上菜速度真係好似新幹線咁快，唔洗幾分鐘已經有得食。三文魚親子丼定食三文魚好肥美，色澤尚算靚仔，油脂分佈相當平均。三文魚子晶凝通透，睇到都好開胃。蒲燒鰻魚定食鰻魚夠晒大條，分埋比朋友食仍然綽綽有餘。醬汁好鮮甜，我食鰻魚飯最睇重個醬汁，因為個醬汁如果調味夠鮮甜，撈飯真係冇得輸，所以呢碗飯越食好開胃，事關可以撈汁食晒啲飯。定食跟餐沙律同埋麵豉湯，不過不失，正常水準。火炙三文魚壽司表面輕輕熟，口感好過癮！炸墨魚咀比較少日本舖頭會做呢味小食，食落夠香口，而且溫度好夠！炸軟殼蟹手卷軟殼蟹係好惹人喜愛嘅食材，表面淋少少醬汁，簡單又好味！