喜惶點心專門店

Open Now

Now Closed

今日約左媽咪飲早茶，問佢想飲茶樓定點心專門店，佢就話想食女人街入面一間黃嘅點心店。但我不嬲就對女人街嘅餐廳冇咩好感，感覺係得個平字，而且之前食過幾間伏嘅，不過見佢係黃店就試下啦。佢舖頭有两層，不過每層都唔係好多位，大約一層得5到6張桌，如果你係約一大班飲茶嘅話就可能會坐得逼少少。見佢menu寫自己係牛肉世家，靠賣牛肉起家，咁我哋梗係要叫啦。我哋叫左粟米煎牛餅同牛肉燒賣，佢两樣嘅餡料其實都係一樣，就係牛肉球嘅味，感覺就係炸左嘅牛肉球同有層皮嘅牛肉球。同埋佢芫荽味都幾出，搞到冚左啲牛肉味，有啲失望。而其他點心都係中規中矩，有餡料喺入面個啲點心都感覺有啲偷工減料，好似叉燒包同蝦腸咁，皮厚料薄，搞到食落有種空虛感。見有個叫芥末沙汁三文魚春卷幾得意就嗌左啦，點知個汁又淡，中間舊青瓜令佢個味更清，好似淨係食緊個炸皮咁。雖然個菜式設計得幾好，但味道真係有待改進。