Neighbor (Closed)

好早以前就已經想試下呢間餐廳，早排仲加入左台灣美好年代嘅飲料，最近終於一試。坦白講我覺得幾款食物都有改善空間，反而飲料幾啱飲嘅。一棟唐樓建成，地下可外賣飲品，一樓偏工業風裝潢，加草牆、木枱櫈，傾計聚會都適合。餐牌選擇多，沙律、薄餅、小食；主食有扒、意粉、意大利飯、漢堡，價格同一般西餐廳差不多。套餐人均二百五蚊由前菜到甜品有齊，不過當日唔係太餓，我地只係點左沙律、小食同一份主菜。炸雞翼 $68雞翼炸到超乾身，我冇乜所謂嘅，都鐘意脆口野，但肉就老得滯軟殼蟹帶子沙律配香檸汁 $78軟殼蟹唔會話好油膩，帶子煎到幾香。沙律菜沾左少少油香，又幾好食，沙律菜正常質素。美國安格斯肉眼 $198肉眼睇落賣相唔錯，跟埋薯條、野菜，不過塊扒本身質素唔算特別好。肉眼較薄身，容易過火，外層微焦，點七成變左全熟，口感好難嫩啦，但都不至於話完全咬唔開。薯條夠脆，不過充滿空氣感。烤布蕾波波茶 $34美好金菠蘿 $32/少甜奶蓋雖然虛無，但都烤得幾香，黑糖味明顯，完全冇茶味，我當鮮奶飲。好在直接飲用都唔會太甜，珍珠偏細粒，軟硬適中，幾好噍頭。後者就係一杯啱啱好嘅菠蘿沙冰，清爽！