Olive Cafe (新領域廣場) (Closed)

煙鴨胸蒜香白酒意粉$88。鴨胸好滑，外皮肥而不膩，煙燻香味同鹹味啱啱好。意粉軟硬適中，口感油潤順滑。番茄仔酸酸哋，豐富咗味道又開胃解膩。德國鹹豬手$148。肉嘅份量好足，熱辣辣香味撲鼻。外皮炸到脆卜卜，皮下面係一層油脂，連住一齊食，脆口得嚟又有啲滑同黏，滿滿骨膠原嘅感覺。瘦肉部份好腍好入味，唔會太乾或柴，甘香可口。蘸芥末或者蜜糖食，別有一番風味，而且冇咁油膩。Honey Moon果然比較甜，但都飲到淡淡嘅荔枝味同桃味。Fruit Punch少少汽，水果味好fresh，冰冰涼涼好解膩。