和家

Open Now

Now Closed

朋友介紹呢一間嘅日式居酒屋，有好食嘅關東煮我哋總共叫咗兩輪。第一輪就試咗佢推介嘅大根，年糕福袋。另外自己揀咗蒟蒻，雞蛋同埋牛筋。店入面有好大個鍋，加熱緊啲關東煮。點菜姐姐好快落完單之後，就會喺側邊𢳂俾我哋，上菜速度都算幾快。而且因為啲嘢食有湯載着，所以都唔會凍得好快。鍾意飲湯嘅朋友可以連關東煮嘅湯汁都飲埋。因為呢間餐廳好似主要做宵夜時段，所以感覺上食物份量唔係好多。我哋叫咗個飯團，有三種口味揀，分別係鹽味，梅味同明太子。我哋揀咗明太子，醋飯好新鮮，飯桶朋友一定會鍾意。係即叫即整嘅飯團，所以紫菜都係脆嘅。串燒方面我哋叫咗雞肉丸子。因為兩人位係喺吧枱，所以直頭喺師傅面前，可以見到啲師傅燒嘢同埋整嘢食。同平時嘅免治雞肉棒唔一樣嘅係，入面冇軟骨。淨係用軟滑嘅雞肉打成，有得揀鹽燒同埋汁燒，我哋揀咗汁燒，味道都唔錯。第二轉嘅關東煮我哋揀咗椰菜卷同埋厚揚豆腐，湯汁都算入味。簡單嘅一餐已經食到好飽啦。