鮨一心 (Closed)

日本料理食得多，今次同友人試下比較少食嘅omakase。店舖門面好低調，入到去更加低調，燈光雖暗，但又坐得幾舒服。坐低後有熱茶，前菜係溫泉蛋。個蛋係凍食嘅，入面嘅蛋白同蛋黃仍處於流心狀態，有水準！另外仲有玉子，甜度剛好，旁邊有酸薑，醃得非常好味！千切大根，係醃過嘅蘿蔔絲，帶甜辣，都幾惹味。麵豉醬青瓜，濃味嘅麵豉配埋清爽嘅青瓜一齊食，味道好夾。然後就開始上10種廚師發辦嘅壽司，我地一路食，師傅就一路整，見佢有好多秘製野放落一個個盒仔度，每款食材佢都好用心揀自製嘅配料，例如梳魚上就配薑絲，帶子就配柚子皮，鯖魚配一塊甜嘅片片等，非常特別有心思。每上一舊壽司，師傅都會用唔純正嘅廣東話講一講個名，好多魚嘅名都無刻意記低，淨係記住食入口嗰種鮮味已經夠了。食完壽司之後會有麵豉湯，味道對我黎講係特濃，好足料！最後嘅甜品竟然有我最愛嘅黑芝麻雪糕，好滿足！