必勝客

Open Now

Now Closed

見Pizza Hut有新出嘅軟殻蟹pizza，就諗住同屋企人去試下，點知打開餐牌先見到軟殻蟹已經賣哂，所以就唯有嗌咗個二人餐，有一個鹹蛋黃醬唐揚雞薄餅、兩個餐湯、拿破崙雞肉意粉同埋雞翼配腸仔。另外我哋加咗幾十蚊，嗌左個炸魚薯條，因為見到佢個賣相好似好靚。首先，佢個鹹蛋黃醬炸雞Pizza真係幾好食。佢啲鹹蛋黃醬油好香嘅鹹蛋黃味，但係又唔會太過鹹。每一塊Pizza上面都有一舊炸雞，個皮夠脆啲肉都好滑，個人認為真係幾好食。而炸魚薯條嘅份量就好多，啲薯條條條都熱辣辣脆卜卜，炸魚嘅粉雖然有啲厚，但係勝在夠大舊同香口。雞翼配腸仔就不過不失，冇乜特別。但係佢嘅雞肉意粉就真係麻麻地，啲雞肉係好食嘅，但係啲意粉就好似未熟咁，有啲難咬，所以只係食咗幾啖就算，希望下次會有改善啦。