agnès b. DÉLICES (Closed)

前排睇報紙見到agnes b推出左限量版朱古力棉花糖，其實自己唔特別鍾意棉花糖不過見佢個罐幾靚又係「限定」加上好耐無食agnes b的朱古力，星期五放工後見有少少時間就走左去百德新街睇下仲有無得買。去到先醒起無左地鋪啦要行去對面agnes b 「complex」（佢呢間鋪賣袋、衫、花又有cafe以家又有朱古大力，所以我叫佢做complex)，上到一樓即見到花店隔離就係賣朱古力的小角落，地方比起以前地鋪少左而且裝修無咁特別，可能要同成間鋪的感覺一致D，所以唔可以再擺以前個D水晶燈等等。Anyway一黎到就見到罐朱古力棉花糖啦，店員一見到我就請我試食，不過唔係朱古力棉花糖以係一板板按重量賣的朱古力，以前都食過覺得質數普通所以無買，我又走去睇下之前都有心思思想試的鳥結糖，不過最後都只係買左罐朱古力棉花糖，唉，「限定」策略係我的弱點。$138只有9粒，好貴呀，好彩我係agnes b會員都有個9折。第二日雪凍後攞出黎食，朱古力味濃，55﹪dark chooclate唔太苦而且無個D較差黑朱古力有的酸味，唔錯！可惜棉花糖個質地可能被雪凍左的關係所以有D韌。