阿媽靚湯 (Closed)

義工過後，同阿媽黎呢度食晏。我要了菜肉雲吞酸辣米線 + 例湯；阿媽要了午餐 : 魚香茄子飯 + 例湯；再加多個醉雞share 食！例湯個老闆娘話黎呢度一定要飲喎！是日例湯係白菜豬肺湯。真係無味精喎！不過講真，有d失望，因為味道唔算十分十分的濃郁，味道偏淡。仍有進步空間。醉雞份量同價錢成正比；還有杞子作點綴。聞下去，酒味是濃的；但食落口，又唔係咁香酒味。酒味未能徹徹底底的滲入雞肉中，所以只有外皮是最有酒味的！雞係雪雞；火候剛好，骨略帶紅；肉質嫩滑。菜肉雲吞酸辣米線酸辣湯底只辣而唔酸，真係一點都唔酸，只係面頭有幾粒酸菜。份量適中，唔會好似譚仔咁多到食唔晒。米線軟硬度恰到好處，不需太多牙力。菜肉雲吞好有水準！皮好薄，但又唔會因為煮得耐而一夾即爛。餡料肉很鮮，唔肥；菜新鮮爽口。魚香茄子飯呢個正！標榜少油鹽無味精，真係做得到喎！魚香茄子本身就好難少油，不過呢度嘅就無其他店咁油膩。茄子份量多，味道好，用黎送飯一流！該店老闆應該係有宗教信仰，牆上貼了聖經金句同故事，還播於聖詩，感覺舒適。