海安咖啡室 (Closed)

星期六陪家人喺西營盤嗰頭買完海味，無意發現呢間老冰室，原本諗住飲杯嘢抖抖，但眼見餐牌相內啲多士同西多幾吸引，就忍唔住一試。結果食咗：1) 撈麵餐(因义燒賣哂，揀咗司華力腸)：偏細碟，似係普通大光麵，撈碎蔥及煎香切片司華力腸，味道實屬一般，個人覺得唔值$42。2) 蔥蛋牛厚多士：賣相唔錯，店員千叮萬囑要落黑椒粉食，多士較為濕濕淋，蔥花雖然好多，但唔香，蛋偏濕滑，牛肉粒食唔出係牛肉，整體味道一般而已，但應該幾啱好鍾意食蔥嘅人。3) 粒粒西多士：$10一粒，$30四粒。厚西多有3層，正中外脆內軟，因為內層蛋汁未完全熟透，所以食到幾重蛋香。備有糖漿或練奶。味道都唔錯。4) 咖啡紅豆冰：$30一杯，凍咖啡味道其實唔算差，但加咗奶製碎冰同紅豆，味道就變得麻麻，結果飲剩咗一半。5) 普通紅豆冰：跟撈麵餐仲要另外加錢，賣相唔錯，但其實除咗面頭嚿碎冰稍為有啲特色之外，冇乜特別，而且味道偏淡，尤幸紅豆都算唔太細粒，且幾夠溶。可能因為呢類老冰室買少見少，所以環境上先吸引到多啲人唻，但整體食物飲品雖然都略有特色，但質素實屬一般，而且價錢中上，故除非經開，否則未必會再唻一試。