La Rotisserie (禧利街) (Closed)

呢個餐廳主打法式燒雞，亦可以選擇鴨肉。可以揀原隻/半隻，或者唔同既set連飲品加side dish。是日我揀左classic set: 燒雞配3款side dish加飲品，盛惠$88。燒雞可揀雞胸肉或雞腿，咁我當然係揀雞腿，不過最尾俾左一件雞胸加一件雞腿。香味十足，不過就有少少燶，亦嫌有d乾，唔夠juicy。但side dish就值得一讚，有約8款凍盤及8款熱盤，任揀3款，包括雜菜沙律/藜麥沙律/薯仔沙律/薯角/薯蓉/炒三色椒等。我最鍾意食薯仔，揀晒3款薯仔款，個外國廚師仲笑我”potato buffet?”薯角不過不失，同平時餐廳既差唔多；薯仔沙律就放左好多材料，有煙肉粒/香草等，口感十足，層次豐富；薯蓉就最驚喜，睇樣好似平平無奇，但食落啖啖忌廉奶香，亦有香料作調味，質地亦好滑好creamy，必食推介！飲品方面可以揀湯或者凍檸茶(加糖/無糖)，我揀左無糖，真係無咩味建議揀有糖會比較好。