騷 (Closed)

嚟到酒吧林立嘅諾士佛臺，試咗最近開嘅樓上酒吧。入到去就見到一部大雪櫃，入面放滿各式各樣嘅香港手工啤酒，雪櫃外面仲分別用啤酒樽蓋砌咗啤酒樽圖案同HKBEER字樣。除咗多款飲品之外，仲有幾款小食同主食等等，雖然唔及西餐廳多樣化，但以一間主打飲嘢嘅餐廳嚟講選擇都算唔少。晌店員嘅推介之下叫咗呢款本地薑試試，係餐廳嘅調酒師自行研製嘅香港手工啤酒cocktail嚟。調酒師晌玻璃杯入面加咗威士忌、薑片、呍呢嗱糖漿、檸檬、蛋白同冰塊，仲灑咗肉桂粉，拎到嚟之後先將麥子薑茶啤酒倒入去再撈勻。肉桂將薑味帶出，甘香易入口，又冇平時飲薑茶遇到嘅辛口感，非常討好。啡菇配自家製黑松露醬未食已經聞到陣陣香氣，大啡菇切成四片長條形，外層蘸漿炸脆內層就軟滑，配上餐廳自家製嘅黑松露醬，夠香之餘又唔會太過濃郁。蟹肉忌廉意粉中間分別放咗蟹肉絲同青瓜絲，忌廉汁幾濃，意粉煮得煙煙韌韌，撈勻嚟食幾鮮味。