Starry Night (Closed)

嗌咗個二人套餐，頭盤揀咗凱撒沙拉同埋蘋果沙律，呢兩個沙律個擺盤都幾靚，凱撒沙律啲沙律菜極度新鮮，個沙律汁帶有淡淡嘅芝士味，麵包粒又烘得夠脆，夾埋面頭一片片嘅芝士，新鮮好味。而蘋果沙律都唔錯，夾埋啲提子乾一齊食，口味獨特。另外散嗌咗一個水牛城雞翼，一向都好鍾意食水牛城雞翼，貪佢個醬汁酸酸甜甜辣辣，呢度個水牛城雞翼完全滿足到我，個酸辣程度掌握得啱啱好，外皮又炸到脆卜卜，正。套餐嘅豬鞍扒改咗牛扒，由於係二人份量，塊牛扒又厚又大，初時仲驚佢會唔會因為厚所以會好韌，但係點知入口極度嫩滑，我平時通常食開五成熟既，今日因為就朋友所以嗌熟啲，勢估唔到佢七成熟肉質都有咁嫩，牛味又夠，簡簡單單落少少鹽同埋黑椒經已無敵。朱古力布朗尼，呢個甜品係今晚一大驚喜位，估唔到呢間餐廳連甜品都咁出色，布朗尼個口感做到煙煙韌韌，唔會話好似出面其他餐廳咁整到成個莎莉蛋糕咁實的的，加埋嗰球雪糕同埋曲奇餅碎一齊食，呢個甜品被我地秒殺。