1+1 吧 (Closed)

同幾個朋友行街咁啱經過一田見到有人走嚟介紹$78任食酒店甜品自助餐，心諗酒店嚟講都幾抵食喎，就算去starbucks都唔止呢個价錢啦！於是個派傳單員就帶咗我哋落去！一落到就見到有我最喜歡食即焗朱古力心太軟，朱古力心太軟食落去好流心而且不太甜，仲有燉蛋同綠茶白朱古力蛋糕，又可以自己整紫薯窩夫，仲有藍莓芝士蛋糕和朱古力泡夫，仲有各款杯仔甜品，而且仲有咖啡茶任飲！食食下一半又有意外驚喜，中段時間又推出一個紫薯火焰雪山，即場表演點火即切嚟派，雪山帶有略帶少少酒味和紫薯味，咬落去裏面夾住蛋糕和雪糕，感覺超正好味，雖然今次食唔晒所有甜品，决定下次會再約朋友過嚟食！