Passione Italian Restaurant (Closed)

今日嚟到銅鑼灣食個Brunch ,今日兩條友想食西餐，所以行到去渣甸中心求其篤左一間就上去啦。 呢度係比較正式嘅西餐廳，原來係主打意大利菜。我叫左一個deluxe special set lunch, 5 courses set.先來一個海鮮玉米糕，口感幾特別，味道都唔錯好夠鮮味。 下一個係湯，野菌忌廉湯，非常香濃口感柔滑。 蟹肉意大利幼蛋麵配蕃茄汁。麵條爽口彈牙，充滿蛋味，蟹肉都拆得好細緻，增添香氣。 主菜係烤黑毛豬肩，肉味濃郁而且外層香脆，好食，加埋個蜜糖芥末汁，錦上添花。配菜亦同樣出色，薯仔甘筍通通我都食晒。 甜品係朱古力沙樂美配雲呢拿雪糕，略嫌雪得有啲硬，而且我本身唔係好鍾意甜野，所以覺得麻麻地，不過入面嘅果仁系好香脆嘅。 總括來講呢度價錢偏高，不過環境氣氛恰到好處，服務水準亦高，而且食物亦都唔錯，啲特別日子來食飯都係一個唔錯選擇。