MOO MOO Plus (百德新街) (Closed)

疫情持續，都已經少咗好多出街食飯，不過吊頸都要唞吓氣，久不久都想食一餐好少少，今日就同朋友嚟呢度食lunch。先來一個烤牛肉沙律（ $108 ），估唔到牛肉嘅份量都幾多，唔會太乾，另外仲有車厘茄、黑橄欖、洋蔥和大量沙律菜，加埋沙律醋汁，都幾開胃，顏色又鮮艷。主菜叫咗一個熱帶之堡（$118）share食，有厚厚嘅安格斯牛肉，肉質尚可，再加埋菠蘿和煙肉，當然仲有芝士、蕃茄、生菜等，由於我哋兩個都好鍾意芝士，所以我哋仲加$12要雙重芝士，真係好鬼正呢！我都幾鍾意佢個麵包皮添！ burger附送少量沙律，所以絕對唔驚唔夠菜食。另外仲叫咗個黑松露卡邦尼意粉（ $128 ），雖然第一眼覺得賣相一般，但味道卻超級好味！忌廉汁好濃厚，再加埋黑松露嘅香味，成件事都好creamy，口感好好!配料方面，都係簡單嘅洋蔥、煙肉和巴馬火腿，不過都配搭得好好，好推介！