Tokyo Secret 味之藝術 (Closed)

今晚在尖沙咀剛和朋友吃完麻辣的川菜，途經加連威老道時，沿途看見有不少途人手拎着造型特別兼顏色鮮艷奪目的雪糕甜品邊行邊食，細問下才知近嘉蘭圍轉角位有間日式特色雪糕店“Tokyo Secret味之藝術”，二話不說一於試試。看見這麼多造型亮麗可愛的雪糕，實在不知如何選擇…幾經猶豫終於揀了“沖繩之藍”~ 主要因為貪靚及從未吃過藍色雪糕，味道究竟怎樣呢？店員介紹說這款口味用料是特選3.7北海道牛乳配上獨特之沖繩海鹽，所以有少少鹹味，感受吓沖繩海洋味道。 藍藍的雪糕在七彩繽紛的朱古力豆襯托下超靚，再加上乾冰的煙霧效果，有點捨不得食…終於一啖滑入喉嚨，雪糕香滑清新，頓時令我們仍然麻辣的口腔感到陣陣清涼！😋😋朋友點的“楓之火焰”亦相當不錯，用料是意大利榛子，造型似一座火山口，加入法國紅桑子汁, 形造火山爆發效果，不過是只有煙而不是火焰。味道有些似朱古力，但比朱古力清淡，甜度適中，底部還有數粒爆谷，配合軟綿綿的雪糕，口感分外滿足！冬天在街頭食這麼漂亮的雪糕新地感覺零舍浪漫，不過食完藍色雪糕後嘴唇亦變了藍色，哈哈有點嚇人呢😵！雖然如此，其他款式亦好想試，不過唯有寄望下次吧。