Video
Read full review
2023-07-11
2297 views
新鴻發美食 Xin Hong Fa📍 澳門筷子基南街寶翠花園利耀閣地下439號同朋友喺澳門食嘅第一餐就係人氣高企嘅茶記新鴻發，我細細個就有食，不過一直都係去高士德嗰間，今次搭車沿路見到筷子基有分店，比較就腳，所以就同朋友入去叫咗啲嘢嚟食。 💰$28.5法蘭西多士 🍞雖然食過好多次新鴻發，但印象中好似無食過佢嘅名物法蘭西多士，帶住個遊客，當然要試一試啲熱推食物啦！個人認為呢個法蘭西多士咁受歡迎主要係有三個原因，分別係價錢平、份量大同適合打卡。先講價錢，一份咁大份嘅西多士，整叫即整，上枱時牛油仲係半溶，都只係$30有找，真係抵到爛！其次係份量，我屋企人知我哋食咗呢個西多士，笑我哋食咗成半磅麵包落肚，最得人驚嘅係佢唔係空氣麵包，麵包足料厚實，中間夾住嘅花生醬比較之下，睇落好似好薄咁，其實都唔惹小，好飽肚，食咗真係食唔落飯。最後就係佢嘅size真係非常驚人，無論就咁影定切開嚟影都夠晒吸睛！講咗咁耐，我同朋友食完覺得點呢？我哋大家都覺得如果有至少三、四個人一齊食飯，叫一個嚟share係推薦嘅。但如果好似我哋咁得兩個人食，就會食得比較吃力，去到後半部份直頭係要猜枚決定邊個食，所以唔太建議兩個人又叫
📍 澳門筷子基南街寶翠花園利耀閣地下439號
同朋友喺澳門食嘅第一餐就係人氣高企嘅茶記新鴻發，我細細個就有食，不過一直都係去高士德嗰間，今次搭車沿路見到筷子基有分店，比較就腳，所以就同朋友入去叫咗啲嘢嚟食。
[價錢 Price]
💰$28.5
法蘭西多士 🍞
雖然食過好多次新鴻發，但印象中好似無食過佢嘅名物法蘭西多士，帶住個遊客，當然要試一試啲熱推食物啦！個人認為呢個法蘭西多士咁受歡迎主要係有三個原因，分別係價錢平、份量大同適合打卡。
先講價錢，一份咁大份嘅西多士，整叫即整，上枱時牛油仲係半溶，都只係$30有找，真係抵到爛！其次係份量，我屋企人知我哋食咗呢個西多士，笑我哋食咗成半磅麵包落肚，最得人驚嘅係佢唔係空氣麵包，麵包足料厚實，中間夾住嘅花生醬比較之下，睇落好似好薄咁，其實都唔惹小，好飽肚，食咗真係食唔落飯。最後就係佢嘅size真係非常驚人，無論就咁影定切開嚟影都夠晒吸睛！
講咗咁耐，我同朋友食完覺得點呢？我哋大家都覺得如果有至少三、四個人一齊食飯，叫一個嚟share係推薦嘅。但如果好似我哋咁得兩個人食，就會食得比較吃力，去到後半部份直頭係要猜枚決定邊個食，所以唔太建議兩個人又叫主食又叫西多士，一個人更加唔好，除非你係大胃王！
[價錢 Price]
💰$40
雞扒燴通粉 🥣
今餐嘅戲肉係呢個雞扒燴通粉，我每次去到新鴻發都會叫嚟食咁濟！我知道近排好多人都有介紹呢間茶記，主力都係推介佢哋嘅炒物，例如炒麵同炒通粉。的確佢嘅炒物係好夠鑊氣好出色，但我自己比較鍾意食落無咁油無咁熱氣嘅燴通粉。燴通粉個醬汁食落其實好似快餐腸蛋飯嗰個汁咁，但配落通粉度食都出奇哋夾！每一粒通粉都有醬汁包裹住，好好食！雞扒塊皮煎得好香脆，雞肉唔多汁但嫩滑，又係一值得推介嘅配料。如果淨係拎個燴通粉嚟俾分，我會俾佢5粒星，因為無論食幾多次都係覺得咁好食！
[價錢 Price]
💰$18
鹹檸檬蜜 🍋
全靠呢杯飲品，我哋先KO得晒個西多士喳！個包食得耐會覺得好乾，呢杯凍冰冰嘅鹹檸檬蜜就非常解渴，佢落咗原個鹹檸檬去沖，所以味道好濃，加埋甜甜哋嘅茶蜜飲，喺太陽下暴曬完飲真係透心涼！
Post
