Video
Read full review
2008-10-06
270 views
一直都有 "去澳門前上 OpenRice 做定 research" 既習慣, 但對 "陸舟" 呢個名字可以話係毫無印象... 後經幾位朋友同時提及之下, 就去左呢間餐廳, 作為是次澳門之旅既第一站... (後來先知道, 原來之前一個食評都無人出過, 無啦啦做左"寫第一個食評的食家" )首先, 要講既係, 呢間餐廳既位置非常之隔涉, 真係要講解一下呢間餐廳要點去:友人本旅遊書既地址, 同 OpenRice 一樣, 係 "路環竹灣馬路 (竹灣泳灘側)", 但竹灣馬路長到冇人有, 問左幾個的士同巴士司機, 冇人聽過 "陸舟", 見到地圖有個竹灣泳池晌附近, 想話晌果度落, 好心既巴士司機就同我地講, 話泳池果邊吹到垃垃亂, 建議我地晌過一個站 (即竹灣青年宿舍), 由泳灘既另一邊落, 點知好心做壞事, 原來竹灣海灘好鬼長, 同埋基本上係落唔到去既.... 於是我地沿住竹灣馬路行返轉頭, 沿路打算截的士, 仍然冇的士司機聽過呢間餐廳, 最後行左差不多半個鐘先行到返去 "竹灣泳池" 個路口, 沿斜路行落去十分鐘左右, 竟然行左入去豪宅區, 發覺唔對路, 好彩遇著好心既住客, 話俾我地聽間餐廳其
首先, 要講既係, 呢間餐廳既位置非常之隔涉, 真係要講解一下呢間餐廳要點去:
友人本旅遊書既地址, 同 OpenRice 一樣, 係 "路環竹灣馬路 (竹灣泳灘側)", 但竹灣馬路長到冇人有, 問左幾個的士同巴士司機, 冇人聽過 "陸舟", 見到地圖有個竹灣泳池晌附近, 想話晌果度落, 好心既巴士司機就同我地講, 話泳池果邊吹到垃垃亂, 建議我地晌過一個站 (即竹灣青年宿舍), 由泳灘既另一邊落, 點知好心做壞事, 原來竹灣海灘好鬼長, 同埋基本上係落唔到去既.... 於是我地沿住竹灣馬路行返轉頭, 沿路打算截的士, 仍然冇的士司機聽過呢間餐廳, 最後行左差不多半個鐘先行到返去 "竹灣泳池" 個路口, 沿斜路行落去十分鐘左右, 竟然行左入去豪宅區, 發覺唔對路, 好彩遇著好心既住客, 話俾我地聽間餐廳其實晌我地之前經過果個"竹灣泳池" 個路口沿住條隱蔽石級行落去.... 於是我地又再沿斜路行返上去, 原來要調返轉頭行先會見到個第一幅圖果個頗為神秘既路牌, 仲要寫住 "照常營業 STILL OPEN"..... 你都咪話唔驚....
沿住石級落到去海灘, 見到既果然係司機叔叔所講既 "垃垃亂", 大量雜物同垃圾被 "克格比" 吹到上岸, 可以話係 "劫後餘生"...... 幸好, 餐廳既位置高少少, 未受到克格比既影響....
餐廳分為室內同室外兩個區域, 晌唔穩定既天氣之下, 我地決定坐晌室內, 入到去發覺原來我地 "包場"..... 餐廳環境優美寧靜, 令人有渡假既感覺, 同餐廳外 "劫後餘生" 既感覺, 可以話係天淵之別, 大家到左呢個時間, 先稍為安心一點....
餐廳主打意大利菜, 一張 A3 Size 既 Menu, 已經包含左好多其他餐廳未必有既選擇.... 淨係 Pasta 已經有以下咁多個選擇:
Spaghetti 意大利粉
Wheat Spaghetti 全麥意粉
Squid Spaghetti 墨魚汁意粉
Penne 長通粉
Linguini 粗扁意粉
Spinach Tagliatelle 菠菜寬條麵
Homemade Ricotta Cheese Ravioli 自製利哥達芝士意式雲吞
Homemade Meat Ravioli 自製肉醬意式雲吞
Tortellini 意式餃子
Gnocchi 薯蓉貝殼粉
由於之後仲有好多站既關係, 一行四人只叫左以下既食品:
Mushroom and Parma Ham Pizza - 上檯一刻見到好多"煙", 絕對可以用 "熱辣辣" 黎形容, 適中厚度既餅皮被焗至香脆可口 (後來發覺呢間餐廳係用大型炭火爐黎焗 Pizza 既); Parma Ham 達到風乾效果, 味道屬中上水準, 唔會得個咸字, 四人不約而同話: "爭咁舊蜜瓜" XDDDD
Homemade Ricotta Cheese Ravioli in Olive Oil, Garlic and Pepper - 友人醒水之作, 棄易飽肚既意粉類, 選擇了意式雲吞, 橄欖油﹑蒜蓉同紅椒既配搭恰到好處, 唔會互相搶走其他配料既味道, 咬落去滲出淡淡既芝士, 食完唔會覺得 "漏"
BBQ Beef Rib - 賣相較遜色, 可能同炭燒有關, 牛仔骨被燒至偏黑, 但非常惹味, 牛則屬頗有"牛味", 兼有咬口, 值得推介~
服務方面, 全餐廳既職員都係東南亞人士, 操英語為主, 相信同餐廳既主要客源有關 (除左我地之外, 之後入黎幫襯既全部都係外籍人士), 但服務非常殷勤友善, 個個都面帶笑容, 值得一讚~
總括黎講, 無論餐廳既環境﹑服務和食物質素都屬於中上級, 奈何其位置真係隔涉得可怕, 周邊亦冇其他既配套, 連交通工具都要沿住條頗長既石級行返上去竹灣馬路先有...... 相信餐廳方面絕對要晌 marketing 上落多 D 功夫, 例如搵多 D 暴光既機會, 同埋要改改擺放指示牌既位置啊~
Post
