西灣安記 (Closed)

澳門為食之旅第三站。回到大馬路，原意幫襯黃枝記，不過因為實在太多人，所以決定行多陣先食，但結果越行越遠，而且越來越肚餓，最後去左盧氏大屋對面的西灣安記食午飯。剛入去，沒任何期望，純粹因為太肚餓，睇返餐牌都唔平，同香港的茶記差唔多價錢，而且無得加錢加野飲，不過行到勁累，都算啦。我叫左干炒魷魚麵，女朋友叫左焗豬扒意粉。落左單，唔夠五分鐘我的干炒魷魚麵就到，麵身好爽，係我最鐘意的竹昇麵，麵條本身的麵香，再加埋醬汁，淨麵都覺好食，唯獨魷魚就無咩味，可能炒麵要落重味的醬油，不過魷魚份量都叫多，而鬚的部份先叫入味。直到我差唔多食完，焗豬扒意粉先到，但呢個豬意粉實在價得一試再試。先講意粉本身，唔似一哥咁焗到乾哂水，仲係濕濕地，蕃茄汁只有小小酸，勁開胃，似係新鮮蕃茄味，撈埋好好食。豬扒本身好入味，而且好大塊，仲好鬆口，有無落過咩配料鬆肉就唔知啦，但味道中上。服務方面：其實都唔好預有咩服務可言，好多間澳門食店都係咁，野就好好食，但面口就唔係好好，我地坐低左又無俾水，都叫左幾聲先有人應我地，不過咁近大三巴旅遊區，野都叫好食，雖唔算好驚喜，但都叫可再幫襯。