南屏雅敘

Open Now

Now Closed

幾年前同朋友黎過一次，印象好深刻，所以今次就帶屋企人黎試下。一睇門口就知好懷舊啦。我就鍾意坐樓上多啲既，所以一黎就行左上去。枱面會放住張餐牌，佢冇套餐既，所以所有野散叫，一個人都大約4 50蚊。南屏文治南屏姐係間舖個名啦，入面包括蛋叉燒同火腿。個叉燒一啲都唔乾，蛋又夠嫩，咁樣既配搭超好食。滑肉波蛋出前一丁個麵同湯底味道適中，唔太咸。啲肉好嫩，有沙嗲牛肉麵既感覺，可惜個蛋黃唔係生既，我鍾意食生蛋黃多啲。南屏出前一丁都係南屏，所以材料一樣，但份量就多過文治啦。個叉燒一樣唔會乾淨淨，好好食。呢到既奶茶係葡式奶茶，飲慣港式既可能會唔太習慣同鍾意，但我係覺得okay既。沙翁真係好奈冇見過冇食過，點都要叫番個黎食下。味道我俾6 7分，但懷舊程度就10分滿分，真係唔係到到有呀。菠蘿油係冰火嫁。佢會整番熱個菠蘿包，再放舊凍冰冰既牛油入去，黎到既時候牛油已經有一半溶左。講真，冇話特別好食，同其他差唔多，係多左個feel姐。推薦同屋企人黎下，呢類咖啡室真係買少見少，聽下佢地既故事。同輩年輕既都黎下，可以睇下以前只係係電影見到既咖啡室，食一啲唔係周圍都食到既野。