大良李禧記崩沙

Open Now

Now Closed

我地食完「六記」之後，沿著下環，再轉入十月初五街一直往前走，途中大汗叠細汗(我最慘，著咗恤衫西褲，差啲溶咗)，终於嚟到我地食飯後甜品嘅目的地 - 「大良李禧記」食焞奶。聽朋友講呢度嘅薑汁撞奶是十分出名嘅。(註：到澳門搵食嘅朋友要留意，到舊區搵食最緊要就係要抵得熱，雖則澳門食肆都裝有冷氣，但唔好以為好似香港咁勁，行到身水身汗，入到裡面唔係一時三刻可以「冷卻」落嚟)由於朋友食過「薑汁撞奶」，佢今次轉食「凍雙皮奶」。「凍雙皮奶」份量唔係好多，我朋友仲講笑咁講，「雙皮奶」話明係雙，係咪分開兩盒嚟裝。另一方面，老闆娘攞咗幾舊薑去榨汁，同奶撞埋一齊，誰也搶不了誰嘅風頭，既有牛奶嘅香滑味，入口仲有一股薑嘅鮮辣，幾醒神可口，與馳名嘅「義順牛奶」可謂不相伯仲。雖然食到汗流挾背，但再有得選擇嘅話，我仍然會唔理汗水，到呢度食佢嘅「薑汁撞奶」。食飽之後，友人提出挑戰，提議再到令一間甜品店食多轉，我無懼挑戰，踏上征途。