【情人節系列】紐約人氣蛋糕店朱古力三重奏

之前瘋魔眾多少女同老少女嘅紐約人氣蛋糕店Lady M，情人節前分別推出三款唔同嘅朱古力產品，分別係經典蛋糕、香港限定朱古力同窩心熱飲，唔同分量價錢都有得揀，同Sweet heart分享或者獨嘗都一樣啱。

Lady M備受歡迎嘅其中一個原因，就係佢地嘅出品都選料嚴謹，今次情人節朱古力系列都選用咗法國朱古力製作，濃郁香甜。首先登場嘅係皇冠朱古力蛋糕，呢款嚟自紐約嘅經典款式曾經獲得《VOGUE》選為「紐約十大最時尚朱古力蛋糕」！表面用咗白朱古力片圓環裝飾，就好似皇冠上面點綴嘅瑰寶，而皇冠就係濃郁嘅黑朱古力慕絲加上濕潤嘅朱古力海綿蛋糕，圍邊嘅係朱古力碎粒而頂層係柔滑嘅朱古力Ganache，帶嚟唔同濃度同唔同口感嘅豐富層次。有原個同切件裝，豐儉由人。

另外仲有香港獨家推出嘅情人節限定朱古力脆球，每一層都係完全唔同嘅朱古力：中心係榛子同海鹽味嘅蛋白脆同朱古力，少少鹹令朱古力味都更有層次，第二層係滑溜細緻嘅黑朱古力慕絲，外層就係混入杏仁粒嘅香脆朱古力，最後再加朱古力粉。層層都有驚喜之餘，朱古力濃香亦餘韻悠長。

最後為響應商場嘅活動，海港城店仲有獨家特飲黑森林熱朱古力，熱飲嘅法國朱古力更濃稠豐盈，特別加入嘅車厘子白蘭地令朱古力味道發揮得淋漓盡致更加添酒香。表面加上忌廉、新鮮車厘子同朱古力碎點題，配返件蛋糕就Perfect池啦。減肥？過咗情人節先算啦。

Lady M情人節朱古力三重奏
活動日期：2016年1月21日至2月21日
*皇冠朱古力蛋糕現已開始發售
*黑森林熱朱古力只限海港城店發售

隨時接收最新資訊
讚好OpenRice專頁！