咁多位Cheesecake迷最期待嘅畫面就嚟出現喇！美國人氣芝士蛋糕店The Cheesecake Factory，5月1號，即係下星期一就會正式開張喇！係為香港第一間分店，將會有30幾款經典芝士蛋糕同特色甜品，menu上仲有超過200款每日新鮮烹調嘅菜式呀！我諗到時望住個餐牌，選擇困難症應該又會發作喇！開飯仔啱啱就好榮幸咁有機會去率先試食，即刻同大家打返個報告先：

先睇下頭盤，有各式嘅蛋皮脆卷、粟米片、雞翼等等，而開飯仔就試咗一個睇到個名就覺得好吸引，但食落就知heavy嘅炸芝士通心粉球。一碟有四個波波，size都唔細呀，面頭有芝士碎條，切開個波波又有勁多芝士醬包圍住嘅通心粉，配意式蕃茄忌廉醬，的確係幾香口同濃郁芝士味嘅，但份量真係，食完個頭盤都飽咗一半LOL （留意返呢度所有嘢都好大份）

主菜方面，有意粉、飯、海鮮、漢堡同三文治之類，每個漢堡嘅份量都唔細呀，而芝樂坊漢堡就係唯一一款用長條形麵包做嘅漢堡。烘烤過嘅法包，夾住大蕃茄、烤洋蔥、車打芝士同牛肉漢堡扒，塊扒仲可以好似高級西餐咁，揀要medium定係全熟。漢堡扒都有一定嘅厚度，但就幾腍身同埋juicy嘅。

呢排好似興食牛油果？呢度都有呀。烤雞肉牛油果公司三文治，就算你個口有幾大都好，應該都好難一啖由頂咬到底呀，因為實在係太足料，太豐富喇！揭開塊包逐層數，生菜粒、蕃茄、煙肉、一排牛油果、勁大塊烤雞胸肉，連埋熱溶瑞士芝士同香草蛋黃醬，係香嘅。

另外，嘢飲都有唔少，有奶昔同時都有酒精類飲品，好似Sangria，同各式紅、白酒、Whiskey cocktail都有。

當然，大家最期待，亦係呢度最重點嘅推介一定係食cheesecake。30幾款又真係幾難揀，鮮士多啤梨芝士蛋糕係幾得人歡喜嘅一款，另外仲有無敵紅絲絨芝士蛋糕、Godiva朱古力芝士蛋糕、Tiramisu芝士蛋糕同紅蘿蔔蛋糕，仲有最高嘅松露朱古力蛋糕塔。所有cheesecake都好香濃軟滑，cheesecake迷好有可能食到不斷尖叫，囉。

The Cheesecake Factory
地址：九龍尖沙咀廣東道25號海港城港威商場地下G102號舖
正式開業日期：5月1日

文、相：Kar
片：Kar、Cathy