香港人放假未必會去地中海旅行，但放假就可以去新開嘅Awtar試下正宗地中海菜。地中海菜包括希臘、土耳其、黎巴嫩去到法國一帶嘅飲食文化，常用食材就有Halloumi芝士、薄荷、石榴同芫荽等。大廚Yanar Erhan嚟自土耳其，佢嘅專長係以摩登手法呈獻地道菜式，幫傳統地中海菜升呢咁話。講多無謂，食嘢最實際。
西瓜哈羅米芝士沙律就將烤過嘅Halloumi芝士，搭配西瓜粒同紫蘇葉，加埋石榴汁同橄欖油調味，清新開胃，前菜之選。
而雜錦拼盤就適合胃口細而又想試多幾款嘅Food Lover，可以自己揀四款心水土耳其開胃前菜Mezeler，有Sujuk、Fateyer spinach、Manakish zaatar and cheese等選擇，配自家製皮塔餅或者蔬菜條都得。
到主菜，有炭燒羊肉，用紐西蘭有機羊肩肉碎混入洋蔥、孜然、辣椒粉同鹽膚木。唔好話開飯仔唔提你，呢度嘅鹽膚木並唔係一種木材，而係中東一款帶微酸及水果香味嘅辛香料，所以醃製 24 小時再炭燒之後味道香濃辛辣，香而不臊。
重點係咁多菜式當中唔少食材同香料，都專程從土耳其同黎巴嫩等地引入香港，令菜式風味更正宗地道。
餐廳位於中環蘇豪區，有嘢食之餘當然亦有嘢飲。由擁有豐富經驗嘅調酒師David Bohan為餐廳設計咗14款原創雞尾酒，例子之一係Almond Coffee Martini，由伏特加、咖啡、杏仁糖漿同雲呢拿泡沫調製而成，將咖啡嘅濃香同杏仁嘅獨特香味Mix & Match。雞尾酒之外，亦有一系列從地中海搜羅返嚟嘅佳釀任君選擇。
美食飲品都升哂呢，星期五六夜晚九點後，仲有駐場 DJ 同樂隊表演，從此週末Happy Hour熱點，又多個新名啦。
地址：中環士丹頓街 23 號地下
電話：2530 5900
隨時接收最新資訊
讚好OpenRice專頁！
关键字
中環
地中海菜
酒吧
雜錦拼盤
炭燒羊肉
复制到剪贴板