豊洲水産海鮮丼専門店由做開批發嘅東京築地市場豊洲水産創立，第一間海外專門店就揀咗嚟香港，幾乎每日都會有唔同嘅新鮮海鮮從築地直送到港，當中包括著名漁港三崎港嘅鮪魚(まぐろ/Maguro)。

招牌豊洲海鮮丼足有二人分量，最吸引嘅當然係上面各式各樣嘅刺身：鮪魚、牡丹蝦、甜蝦、海膽、三文魚子、皇帝蟹肉、帆立貝、香蔥鮪魚腩、油甘魚、醋鯖魚、山芋粒同鮮海草。鮪魚仲係包括赤身同腹身兩款，腹身油脂香味特別濃郁，赤身亦相當鮮甜。配埋其他新鮮刺身，真係好有置身築地市場嘅感覺！

而蜜餞梅干香蔥黒鮪火炙丼特別選用日本三崎港嘅水揚黒鮪，店員會即席用火槍輕炙，帶出鮪魚脂香之餘，丼飯加上魚油更滋味。特別選配和歌山紀州蜜餞梅干，酸鹹解膩。可以再按自己口味加上白蔥、一味粉同檸檬汁。

另外亦有兩款美人丼，其實即係喺海鮮丼裡面加入更多蔬果，啱哂愛美嘅女士。無論係秘製香蔥鮪魚腩再加上魷魚、黃蘿蔔、蜜餞梅干，定秘製香蔥鮪魚腩配搭韓味醬鮪面頰都特別清爽香口。

唔想食太多生冷刺身，亦有名古屋風鰻魚丼同蜜餞梅干鹽味牛脷丼兩款。前者有單食同加湯做成湯飯嘅兩種食法，後者嘅燒薄片牛脷香而不膩。

唔單止海鮮丼，連小食都同普通日本餐廳特別唔同。例如汁煮鮪魚眼同鹽燒鮪魚鮫，因為都係鮪魚嘅特別部位所以係數量限定供應，有心想試嘅記得留意。

餐廳喺食材選用上一絲不苟，例如海鮮丼飯係嚴選日本山形縣生拔米，煮出嚟米粒分明，鬆軟可口。而極上魚鮮味噌湯唔單止用上鯛魚、油甘魚等多種魚鮮，仲加入高級北海道知床半島嘅羅臼昆布，提升鮮味。

豊洲水産海鮮丼専門店
2016年9月28日至30日試業
2016年10月1日正式開業