新冠疫情肆虐，但奧比斯同義務醫療團隊及地區夥伴依然積極合作，一齊喺世界各地打擊盲疾，提升當地眼科醫生嘅知識同技術水平，完善地區眼科護理服務，而更重要嘅係協助眼疾患者得到及時嘅眼科治療，令佢哋重拾視力，繼續探索呢個「睛」彩世界。

據統計，全球有4,300萬名失明人士，2.95億人患有中度至重度視力障礙，但其中77%係完全可以預防或治療，所以即使新冠疫情帶嚟各種挑戰，奧比斯仍不斷到落後地區繼續救盲行動。

細個得到奧比斯及時眼科治療嘅Bulgan，長大後擔任奧比斯義務大使。

喺落後地區要及時得到有水平嘅治療唔容易，奧比斯一直透過眼科飛機醫院穿梭各地，幫助眼疾患者重拾視力。喺1997年，年僅10歲嘅Bulgan經歷咗一場嚴重車禍，導致視力受損，需要接受一種特殊嘅淚管手術。但當時嘅蒙古醫生冇相關手術知識，只能為佢受損嘅淚管做基本清理。幸好，得到眼科飛機醫院飛到蒙古，為Bulgan進行淚管手術，令佢可以重返校園，繼續追夢。Bulgan完成學業後決心回饋奧比斯，佢透過唔同方式擔任義務蒙古項目翻譯大使同眼睛健康大使，支持奧比斯將重見光明嘅希望帶畀世界各地嘅眼疾患者。

奧比斯合作夥伴Akhand Jyoti Eye Hospital喺疫情期間，仍為緊急眼疾患者提供服務。

抱住救盲信念，奧比斯嘅合作夥伴喺疫情期間，靈活咁調整服務，喺抗疫同救盲行動之間取得平衡。好似印度實施封城同人流管制，當地嘅眼疾患者以防感染新冠肺炎而減少外出接受眼科治療，大大增加救盲難度。奧比斯合作夥伴Akhand Jyoti Eye Hospital只能配合當地政策，暫時延緩眼科門診服務，只為有迫切需要嘅眼疾患者提供緊急診治。不過佢哋同時亦為解除封城做好兩手準備，例如眼科醫療團隊喺困難之中，仍努力建立節省時間，又可以管制人流嘅檢查流程，減低患者感染新冠肺炎嘅風險。

奧比斯團隊及時為埃塞俄比亞患者送上藥物。

奧比斯一直為唔同地區提供藥物支援，但疫情令運輸受阻，影響奧比斯團隊無法如期將抗生素送畀埃塞俄比亞受砂眼困擾嘅患者。最後，外展團隊決定去患者住所，逐家逐戶派發抗生素，以確保藥物及時送達，並提供符合安全指標嘅眼科治療，使到多達750萬名患者得到及時嘅治療同防治。即使整個治療過程所需嘅時間同成本比以往多，但最緊要係奧比斯團隊能令眼疾患者感受到無私嘅大愛！

每年10月第2個星期四係「奧比斯世界視覺日2021」，今年就係10月14日，奧比斯期盼喺呢日向世界每個角落傳達希望、信念同大愛呢幾個主要訊息。誠邀大家一齊參與，支持救盲行動。現凡捐款出一分力，令奧比斯幫助更多視障人士，都會隨機獲得一枚奧比斯睛彩襟章作紀念！

每個襟章都有獨特意思，由左至右嘅小熊眼代表信念，心心眼代表大愛，閃閃眼代表希望。

如捐款HK$1,000或以上，更可獲限量版奧比斯睛彩襟章套裝一套。立即一氣呵成，將所有款式帶晒返屋企啦！

想捐款可以Click入呢個網址：https://bit.ly/2VI0K3w

*圖片只供參考
*資料由客戶提供