《黑白大廚》熱潮繼續蔓延！節目中擔任評審之一嘅白種元，有「韓國廚神」之稱，除咗鍾意四處覓食，仲開設多個餐飲品牌。今次首度登港嘅燒肉店喺全球有超過120間分店，當中包括日本、美國、加拿大、泰國等地，而香港店同樣會沿用白種元親自研發嘅食譜，開飯仔帶你開業首星期率先體驗吓！

韓國Oppa駐場 教你食招牌名物

韓式燒肉店主打一系列炭火烤肉菜式、韓式小食同傳統主菜。店內有由韓國總店遠道而來嘅Oppa駐場，不時主動幫客人燒肉，並溫馨提示各款肉品嘅建議食法，指引清晰，即使未曾喺韓國店用餐，都有當地嘅完整體驗。

白種元話題燒肉店，開業首星期已經吸引食客開門前喺門外等候

店內有韓國店員幫忙，為燒肉體驗加分！

餐廳佔地全層，空間頗寬闊，分別設有韓風鐵圓枱同卡位用餐區，每個烤爐亦砲有獨立嘅抽煙機。食客全程可以用平板落單，仲有招牌菜式嘅「美味建議食用方法」，設計貼心。

裝潢有韓國路邊攤小店嘅感覺

全自助平板落單

先送上韓式前菜，可以無限添食

皇牌必點：炭火烤肉、五花肉

燒肉店嘅皇牌名物一定係炭火烤肉，薄切豬肉分別以秘製辣醬同香甜秘製醬油調味，店員建議將整盤肉一口氣放入燒爐，再不斷翻炒，過程有啲似辣炒豬肉。網民較推介烤肉配秘製辣醬，甜辣惹味，配爽嫩肉質都幾夾。

炭火烤肉配秘製辣醬（$119/份），所有肉品跟配蔬菜、沙律、香蔥同醬汁

炭火烤肉特別配有惹味辣醬汁，令層次感更豐富

另一個人氣肉品就係帶皮五花肉，可惜當日缺貨，開飯仔就揀咗五花肉。脂肪同肉質比例均勻、肥瘦相間，燒製嘅過程散發住香噴噴嘅油香！呢款建議蘸79秘製芝麻油一併食，更能突顯五花肉嘅鮮甜。仲可以自製菜包肉，一片菜、一塊肉、一瓣蒜片咁配搭都好食啊～

五花肉（$119/份）

韓式食法當然要有菜包肉啦

人氣7分鐘豬肉泡菜湯+芝士雞蛋羹

餐廳嘅韓國料理係好多食客專程訪店嘅原因之一，當中包括招牌7分鐘豬肉泡菜湯。湯底基調係由韓國娃娃菜同韓國辣椒粉醃製出嚟嘅泡菜製成，加埋豬肉一齊熱辣辣滾上，香氣逼人。上枱後，店員會剪碎湯料，令每個食材吸盡湯汁精華，配白飯食都方便啲。

7分鐘豬肉辛奇配飯（$79）

喺白飯內先後加入泡菜豬肉湯同紫菜，一啖食好滿足

雞蛋羹用熱鍋盛上，加上原片芝士、粟米同紅蘿蔔，口感似蒸蛋，趁熱食會有拉絲效果㗎！食到最後一啖仲暖笠笠，超推薦一定要趁熱食。

芝士雞蛋羹（$49）鹹香又唔膩

另有約5款傳統菜餚；雜菜炒粉絲（$129）口感Q彈，調味恰好

雖然現場見唔到白種元，但都有白老師嘅蹤影止癮

SAEMAEUL
地址: 尖沙咀寶勒巷3-7A號萬事昌廣場1樓1A號舖

文：Sharon
相、片：Yan Yan